馬度亞基帽子戲法領銜 車路士客場大勝狼隊
上半場激戰互有攻守 比分一度平手
車路士喺馬度亞基個人上演帽子戲法嘅帶領下，作客大勝狼隊6:2。
周日喺狼隊主場進行嘅英超比賽中，車路士因拉菲亞腿筋受傷而缺陣，加上將安官古收起，改由馬度亞基同梅迪歷任正選。開波後車仔即刻取得甜頭，先係馬度亞基右路抽射被撲出；隨後高爾彭馬開出角球，尼高拉積遜喺遠柱接應狼隊守衛批後嘅解圍波一頂破網，兩分鐘車仔已領先1:0。
落後下狼隊都有黃金機會，9分鐘古亞開出角球，莫斯基拉衝前一頂，可惜僅僅柱邊出界。16分鐘史特拿臣右路直線交畀古亞燙射破網，但因為史特拿臣接波時越位在先，入球無效。其後車仔有馬度亞基右路拉弓被救出，狼隊隨即反擊，但史特拿臣右路傳中，古亞僅僅未能接應。27分鐘，艾治洛希一人喺中路帶波至禁區頂位置交直線，入楔嘅古亞抽射破網，追成1:1平手。
上半場尾段，古亞喺禁區接應隊友右路傳送第一時間抽射，可惜中楣。另一邊廂車路士一次快攻，積遜接應門將長傳頭槌二傳，高爾彭馬見祖斯沙出迎，第一時間笠射得手，45分鐘車仔領先2:1。但補時5分鐘，狼隊由托堤接應艾治洛希傳送作二傳，史特拿臣門前快腳一篤破網，追成2:2完上半場。
馬度亞基帽子戲法 車仔6：2屠狼
下半場車仔火力全開 馬度亞基獨中三元
下半場柏度尼圖入替梅迪歷倒戈，49分鐘，高爾彭馬中路分波至右路嘅馬度亞基，後者入楔埋門省中艾治洛希破網，車路士領先3:2。狼隊於57分鐘有利明拿接應傳送半窩利抽射炒高，隨後車路士再入一球，馬度亞基右路窄角度燙射破網，58分鐘拉開至4:2。
5分鐘後以同樣嘅進攻模式，再一次由彭馬交右畀馬度亞基完成帽子戲法，63分鐘車仔領先至5:2。78分鐘，利明拿一度將皮球送入網窩，但托提接應作二傳時越位在先，入球無效。80分鐘，柏圖尼圖左路傳中，祖奧菲力斯後上抽射入網，車路士最終以6:2大勝完場。
延伸閱讀