綠木連場建功 馬賽新星冒起
綠木入波救馬賽 兩場入三球媲美皮耶
美臣格連活連續第二周喺法甲成為入球功臣，周日喺主場對蘭斯嘅比賽建功救駕，助球隊逼和對手2:2。
馬賽喺上半場25分鐘先由哈列建功，但喺下半場短短4分多鐘嘅時間內，蘭斯將形勢扭轉，阿基美同耶耶科芬拿各入一球，將比數反超前。
曾陷爭議轉戰法甲 重拾昔日光芒
不過，比賽踢到71分鐘，莊拿芬路半單刀射門先中柱，而其後攻勢延續，左閘嘅美林再射門被對方門將撲出，但美臣格連活（Mason Greenwood）立即喺門前頭槌「執雞」頂入，替球隊扳平2:2完場。
連同上場作客比斯特大勝5:1，「綠木」兩場比賽已入3球，喺法甲大放異彩，表現受盡讚賞。根據Opta嘅數據，上一個喺法甲頭兩場代表馬賽可以射入3球嘅球員，就係2013年由里爾加盟嘅皮耶。
格連活因為曾捲入家暴案，遭母會曼聯停賽，雖然後來訴訟取消，但因為所引起嘅爭議，令曼聯決定唔再起用佢。上季被借去西甲嘅基達菲效力之後，今個夏天改投馬賽，轉會費據報3000萬歐元。
延伸閱讀