曼市打比戰 藍月以互射12碼奪社區盾
代表英超開季嘅社區盾周六舉行，曼聯同曼城喺尾段各入一球，賽和1:1。最後藍月喺互射12碼以7:6擊敗紅魔，成功捧盃。
曼城以小將麥卡迪、柏麥擔正，同快翼杜古組成鋒線支援射手哈蘭。曼聯新加盟前鋒荷倫先列後備，由拉舒福特、馬迪、加拿高、費南迪斯組成攻擊線。
藍月喺上半場率先佔優，但麥卡迪嘅妙射擊中遠柱。曼聯慢慢站穩陣腳，32分鐘創造一次精彩組織，加拿高殺入禁區，同卡斯米路打出一次撞牆式配合，無貪功傳中，可惜馬迪未能接應呢個大好機會。4分鐘後，紅魔再有攻門，但拉舒福特無人看管下射遠柱出界，雙方半場踢成0:0。
曼城後來居上 互射12碼險勝
56分鐘，費南迪斯扭過對手後轟入一記世界波，但被判越位在先。曼聯喺75分鐘再有入球機會，加拿高傳至左路，但拉舒福特射中柱。曼聯嘅優勢終於有回報，加拿高喺右路過咗兩人後射入，為紅魔開紀錄。完場前，柏麥右路傳中，比拿度施華力壓比斯達頂入，曼城逼和1:1，雙方要互射12碼分高下。
互射12碼環節，曼聯有山祖同伊雲斯射失，曼城有施華主射被奧拿拿撲出。最終藍月以7:6擊敗紅魔，勇奪社區盾為新球季打響頭炮。
延伸閱讀