曼城技高一籌 擊敗車路士開季報捷
曼城2:0擊敗車路士 哥迪奧拿戰術佔優
曼城周日喺英超衛冕首戰作客硬撼車路士，喺呢場雙藍會師徒較量下，藍月領隊哥迪奧拿完勝佢嘅昔日助手、而家成為對手主帥嘅馬利斯卡。靠住賀蘭同哥華傑治各入一球，曼城以2:0贏得開季首勝。
除咗洛迪靴蘭迪斯缺陣，曼城仲將霍頓同卡爾獲加等今夏最遲歸隊嘅一批球員放喺後備席。今夏由基朗拿轉會過嚟嘅巴西翼鋒沙維奧則正選上陣，同杜古負責兩邊側擊。車路士方面，上季缺席全年比賽嘅韋斯利科芬拿同拉菲亞都正選披甲，而安素費蘭迪斯繼續代替受傷缺陣嘅域斯占士出任隊長。
賀蘭開紀錄 哥華傑治鎖定勝局
車路士今季由馬利斯卡執教之後，更加著重傳控，因此今場整體打法上同曼城有啲相似，同樣都係排出4-2-3-1陣式。不過薑還是老的辣，杜古喺18分鐘喺左路發難，斜傳入禁區，賓拿度施華想背身控球，但只係觸到波皮，反而更順咁落喺賀蘭腳下。呢位兩季英超金靴得主擺脫咗高維同古古尼也嘅夾擊，射破羅拔山齊士把守嘅大關，幫曼城打開紀錄。
領先之後嘅曼城繼續施壓，22分鐘有迪布尼喺中路接應沙維奧傳球，禁區頂起腳僅出界；37分鐘，再有杜古嘅遠射，被羅拔山齊士飛身撲出底線。車路士方面，完半場前有高爾彭馬禁區頂射門，令艾達臣甩手，尼高拉積遜門前補中，但後者被判罰越位在先，入球無效。
下半場，曼城即刻換入霍頓取代沙維奧，而落後嘅車仔就去到58分鐘，先至以新兵柏度尼圖入替表現平平嘅安官古，之後基奧同迪斯貝利賀爾都先後上場。61分鐘有次近門機會，積遜兩碼起腳被艾達臣擋出。
曼城穩住比賽節奏，直到84分鐘藉住車仔後場解圍唔遠，倒戈嘅哥華傑治截走皮球，連續避過摩西斯卡斯度同安素費蘭迪斯嘅攔截，喺禁區外勁射入網，幫曼城鎖定2:0勝局，順利打開今季勝利之門。
延伸閱讀