【歐國杯熱身賽】阿奴杜域：老當益壯
奧地利足壇老馬 掀起火花
阿奴杜域（Marko Arnautovic）喺上屆已經有出色表現，今屆35歲依然係陣中具影響力嘅球員。講到奧地利近代足球嘅代表人物，會想到保士達、靴索，甚至英超球迷熟識嘅曼寧加，不過真係喺EURO留名嘅則係華斯迪（Ivica Vastic）。華斯迪喺2008年決賽周對波蘭嘅比賽中，以38歲257日之齡成為賽事歷來最年長嘅入球者。阿奴杜域過去經常因為場內外嘅紀律問題遭受處罰，被認為係麻煩球員，但喺球場上佢嘅火、佢嘅衝勁從來唔可以被低估。
獨特經歷與貢獻 經驗不可或缺
上屆EURO，阿奴杜域喺分組賽入波協助球隊殺入16強，對意大利嘅比賽中屢次埋門構成威脅。本季，佢喺國際米蘭多數時間係後備，但依然有令人印象深刻嘅表現，例如歐聯16強首回合對馬德里體育會嘅後備上陣中，雖然屢次失機，但最終還係攻入奠勝球。今屆EURO決賽周，阿奴杜域未必係主帥漢歷克心目中嘅首選，可能更多係依賴弗賴堡嘅基哥赫治，但喺面對強敵嘅時候，隨時需要阿奴杜域嘅「火」同埋佢嘅經驗，話唔定佢會效法華斯迪喺高齡時再建奇功，甚至再度攻破波蘭大門。
延伸閱讀