何詩蓓200米自由泳最大勁敵

香港飛魚何詩蓓喺呢屆長池世界游水錦標賽200米自由泳最大勁敵、澳洲泳手迪梅絲（Ariarne Titmus）星期日（23號）喺400米自由泳決賽游出驚人3分55.38秒奪冠，並打爛世界紀錄。迪梅絲曾喺東京奧運擊敗何詩蓓奪金，呢場「宣言式」400自決賽，再次展示難以置信嘅速度。
體能、科技等唔同方面都可以促成游水嘅「勁」，然而喺加拿大新星麥堅杜殊（Summer Mcintosh）同美國泳手莉迪姬（Katie Ledecky）同場嘅迪梅絲，大概勁喺收放自如吖嘛。
今晚日本福岡上演嘅世界泳聯長池世界錦標賽女子400米自由泳決賽，何詩蓓嘅200米自由泳勁敵迪梅絲、麥堅杜殊率先同場較量，梗系有擅長中長腳自由泳嘅一代「女水神」莉迪姬。22歲迪梅絲由落水開始就已經稍為帶頭，喺麥堅杜殊緊隨下，佢喺中段仍略略放慢。
迪梅絲以2分56.90秒完成前300米，過麥堅杜殊同位列第三嘅莉迪姬快近2秒。眼見最後100米莉迪姬突然間變速由後趕上，迪梅絲依然系可以加速，以28.87秒完成最後五十米，游出3分55.38秒新世界紀錄。莉迪姬以三分58.73秒到第二、紐西蘭泳手費韋特（Erika Fairweather）以三分59.59秒摘銅，加拿大小將麥堅杜殊以三分59.94秒到第四錯過頒獎台，中國嘅李冰潔以4分01.65秒到第五名。
觸池，之後，迪梅絲除低泳帽徐徐忘向時間螢幕，冇影水、冇大叫，只系微微一笑，起拳並與離線、摘銀嘅莉迪姬拍手，仿似一切都喺意料之中。賽後迪梅絲表示自己對對手瞭如指掌，清楚強如莉迪姬同麥堅杜殊，唔會輕易犯錯：「我淨系得個方法贏，就系全力以赴，邊個可以搏到最後，邊個就會贏。」
400米自由泳女子世界紀錄由2014年起，長達八年都系美國名將莉迪姬名下，直到迪梅絲2022年5月喺澳洲遊水錦標賽以三分56.40秒打爛。加拿大16歲天才泳手麥堅杜殊今年3月喺加拿大測試賽游出3分56.08秒新世績，唔夠4個月之後，迪梅絲喺呢屆世錦賽游出驚人3分55.38秒，再創新紀錄，更加成為第一位游入3分56秒嘅女將。
迪梅絲喺小將麥堅杜殊追趕下，控制速度，僅保持喺一個領先位置，係為留有餘力應對莉迪姬嘅最後關頭變速。迪梅絲早喺東京奧運200自決賽就攞「示範」過一次——最後五十米由後反超前何詩蓓奪金。